美俄對出兵敘利亞的盤算

美國其實是默許俄羅斯出兵敘利亞的。美國盤算打擊ISIS已久。但在現實上，最能夠有效打擊ISIS的組織，偏偏就是敘利亞的巴沙爾政權，亦即是美國的死對頭。以往美國曾經試過支持其他既反對ISIS又反對巴沙爾的地區組織。然而，這些符合美國心意的組織，大多是由比較錫身的中產或知識分子所組成。說穿了，你要這些組織打爛仔交係無可能嘅事。

而且，面對七國咁亂嘅現實情況，就算讓美國成功打敗ISIS以及巴沙爾，權力真空亦只會導致其他新敵人的出現。即便只是放飛彈，打仗仍是燒錢行為。美國打得幾多次？其實，各個持份者已經開始在敘利亞劃分自己嘅實質勢力範圍。連美國嘅盟友，土耳其和約旦亦如是。巴沙爾政權嘅所在地，基本上不會影響到美國的利益，而美國亦無法染指。既然現在俄羅斯想介入敘利亞，美國送個順水人情又何樂而不為？至於巴沙爾政權嘅所在地，讓俄羅斯拿去便是了，反正我美國又拿不到。

至於俄羅斯方面，當普京搞到對外、對內政策都一團糟的時候，把國民視線轉移到敘利亞明顯係一個好選擇。熟悉俄羅斯歷史的人，會知道俄羅斯人古往今來都渴望控制伊斯坦堡及達達尼爾海峽－這個通往俄羅斯嘅地中海咽喉。但是，俄羅斯人幾百年來的願景要到二次大戰後，蘇聯控制敘利亞的塔爾圖斯港口才能變相實現。所以俄羅斯人對敘利亞有著一定的情意結，並覺得出兵敘利亞是國力強盛的象徵。

最後，我懷疑俄羅斯日後想利用敘利亞作為下台階，以換取西方在烏克蘭某方面的讓步。事實上，俄羅斯要控制克里米亞和烏克蘭東面兩個省，是非常吃力不討好。現在的情況，俄羅斯既要蝕大本去養活當地的人，又不見得能夠對烏克蘭發揮更大的影響力。俄羅斯實在需要一個下台階，一個似是而非的讓步，來重建與西方國家的關係。

歷史不可能一式一樣地重現

2011年以前，恆指每逢見底後，上升的速度和成交，都會有明確的增長。可是2011年的底部便很不明確。恆指於16200點見底後，可以單日裂口爆升1000點，然後第二日已經後勁不繼。又可以錘頭及倒轉錘頭隔日出現，令人無所適從。沒有先見之明的話，2011年最後幾個月份真的很難過。

比較可能的解釋是：當時香港股民已逐漸成熟，而香港股市也逐漸如西方股市般，不再上下波動四五成。可是牛熊分界也從此變得模糊，難以捉摸。

現在到了2015年，到底恆指是否已經見底了呢？見底的話，會是如2011年前一般明確地上升，還是如2011年般曖昧地上升呢？暫時我們相信，恆指如2011年般上升嘅機會較大。不過我們仍是要摸著石頭過河，一邊炒股，一邊修正我們的估算。

老實說，歷史是不可能會一式一樣地重現的。很多人喜歡說歷史總是會不斷重複，但事前他們卻又講唔出歷史會如何重複。事後才把兩件事的共通點找出來又有何用？重要的是兩件事上一定有"subtle difference"，而這"subtle difference"才是關鍵，亦難以預估。所以炒股永遠是見步行步，摸著石頭過河。

今日策略 5/10/2015 - 再戰細價股

港匯強爆燈，道指和ADR星期五晚反升。星期五恆指本身的表現不錯，中價股爆升。加上熊證街貨數量遠遠大過牛證，基於以上種種原因，呢一刻好難唔睇返好後市。

幸好，經過周末，我係撳過成一千隻股票嚟睇之後，絕大部分細價股如星期五觀察，係未郁過，而且仲係築緊底嘅。所以今日如無意外會追入一啲準備突破嘅股票，機會還多的是。

有無機會聽日變咗摑自己兩巴，聽日打後個市繼續跌？絕對有可能。呢個相信係好多細價股仍未開炒嘅原因。始終大陸經濟有啲隱憂，加上中國近期嘅人為操縱市場舉動，比以前多咗好多。估唔到中國政府想點。舉例說，就算你唔妥李嘉誠，係唔係有需要用官媒鬧衰佢呢？鬧衰咗之後又點呢？其他有錢佬會點諗？真係有啲難明……

有無隱憂都好，聽日都係要入市照炒㗎啦！世事咁簡單嘅話，呢啲錢都唔到我賺啦！有時係要估估下㗎啦！祝大家好運！

淺談普京對西方發動戰爭可能性

之前提到，油價在很長的時間內大升機會不高。有讀者朋友問到，俄羅斯會否因此發窮惡，進一步對西方發動戰爭，以轉移國民視線。

對於這個問題，我們只怕普京自己都覺得言之尚早，未有決定。可是，幾個主要變數相信會對此問題有決定性嘅影響。現不妨列舉之與讀者分享：

（1）普京傾向「玩鋪勁」
西歐和美國人活在太平國度太久，以為現有由他們建立的世界政治秩序將會永遠不變。誰知在平行時空的俄羅斯唔同你唱呢支歌仔。俄羅斯係2008年入侵格魯吉亞，2014年又侵入烏克蘭。如果俄羅斯經濟真的無法復甦，為何你覺得普京會冇膽進行更多嘅入侵，以轉移國民視線呢？

（2）西方列強對俄政策漸有共識
當然，西歐和美國人也不是盲的，只是民主社會面對一些重大事件，一般要更多時間凝聚共識。以美國為例，2009年，奧巴馬政府率先提出與俄羅斯「重啟(Reset)」外交關係，更放棄在波蘭建立導彈防禦系統，及在捷克建立雷達設備的計劃。可是，有見烏克蘭的事態發展，在2014年，奧巴馬亦終於在愛沙尼亞及波蘭發表強硬講話及承諾給予北約同盟更大的支持。此外，傳統上比較親俄的德國，亦開始帶領歐盟對俄羅斯實行更強硬的制裁。

（3）歐盟決策缺乏軍事支持
德國很大程度上在帶領歐盟對俄政策。可是，歷史原因使德國和歐盟的任何政策缺乏最終的、強力的軍事支持。所以，對俄的政策，在緊張關頭始終需要由美國或美國帶領的北約去主導。但是，美國在2017年到底會由民主黨還是共和黨入主白宮也未可知，所以事態最終發展現階段真的不好說。

已發展國家實在太耐未經歷過戰爭的滋味，加上世代更替，新一代的人無可避免會有錯覺以為戰爭不會再來。這正是為何俄羅斯可以在烏克蘭初嘗甜頭的原因。但戰爭好久不來，不代表永遠不再來。其實炒股票也是如此。股災未到，不代表股災永遠不會再出現。所以我們炒起股票上來永遠是謙卑和戰戰兢兢的，其實是同一道理。

寫這類地緣政治文章吃力不討好，香港讀者多半興趣不大。所以希望大家，如果你難得地對我們寫的這類文章有興趣嘅話，真的要用share和like來告訴我們。多謝大家！

今日策略 29/9/2015 － 走晒股票都賺到錢？

ADR跌緊500點。估計今朝早我哋會走50%－100%股票。

其實我哋睇個市唔係太淡，但係如果個市狂升機會唔高嘅話，成手都係股票，expose晒自己又好似有啲無謂。遲啲先追返入潛在損失都應該唔大。

我哋估今朝嘅走勢會係：（1）高開低收。可能係裂口低開200點，再插落去500點；（2）又或者裂口低開400點，升返上去200點，再跌落600點之類。大原則都係早上就走咗啲股票。冇眼屎乾淨盲。

大部分人也許冇我哋咁灑脫，成日嗌走晒啲股票。依個心態其實可以理解，因為走晒全部股票代表之後幾日一定唔會有錢賺。我哋自己以前何嘗唔係咁？香港人係咁心急㗎啦。

要對付呢個問題，我哋嘅獨門秘方係，有唔同嘅炒賣model。唔單止唔同嘅炒股票model，我哋其實仲有炒外國股票同埋外匯嘅model可以用。所以走晒啲股票都唔等於賺唔到錢。只不過係你俾我揀，我會揀炒香港股票，因為始終呢樣係自己最熟悉，可以賺得最多錢嘅嘢。

適合炒股票的命格？

坊間好多對紫微斗數有啲認識嘅人，都好鍾意睇下自己個盤係唔係火貪格。因為火貪格係暴發嘅命格，適合炒股票云云。

值得注意嘅係，火貪格其實係一個既可暴發，亦可暴敗嘅命格。呢個係口訣式嘅講法。舉個例子：有個人突然之間中咗六合彩，又或者繼承咗一筆巨款，於是辭職唔撈，去下旅行。銀行或者基金sales發現咗依件事，於是係匯豐120蚊或者中人壽50蚊嘅時候，遊說佢買呢啲藍籌股或者相關嘅accumulator。將心比心，當一個人從未試過有錢炒股票嘅時候，實會以為藍籌股好穩陣㗎。結果上天俾咗舊錢你，你二話不說訓身買股票，仲要有錯覺以為自己屬穩健投資型云云，結果咪即刻賴嘢囉。

所以其實紫微斗數上嘅火貪格，唔完全係一件好事。你有可能暴發，亦有可能暴敗。所以最為重要嘅係，當你暴發咗之後，你係唔係都有能力保有呢舊錢，而唔會蝕咗佢呢？呢度就考你後天嘅能力和智慧啦。

選擇適合自己嘅炒股模式

話說坊間其實有好多種成功嘅炒股方法。雖然日前我哋提到技術分析最適合八十後，但係其他嘅方法亦有其優勝之處，關鍵在於你要選擇適合自己嘅模式。

當年見到有朋友用財技炒股法賺到第一桶金，覺得好有型。但係先天無相關人脈、背景，做起上嚟事倍功半。其實正正係犯咗以己之短、攻敵之長嘅錯誤。所以我哋用自己獨特嘅學識背景，主攻技術分析，將自己嘅炒股模式由冇砌到有，建立咗一套自己嘅方法。

在小說裏面，小龍女係重陽宮擊退西域三大高手之後，奔到玉虛洞前，再戰金輪法王。金輪法王一見到令佢大吃苦頭嘅玉女素心劍法，就已先行怯了。又見小龍女將套劍法愈耍愈快，竟然收起自己的五輪，傻咗咁同小龍女鬥快，只守不攻，淨係掛住自保。其實金輪法王根本不用同小龍女鬥快，反而一早用個金輪，大力扑落去小龍女個頭度，咁已經足夠K.O.小龍女㗎啦。

做人嘅嘢，最重要係要認清自己，運用自己嘅優勢。每人自有適合自己嘅炒股方式，又何必羨慕他人呢？

聯儲局議息尤如賭Poker

今日見到有人係Facebook話，聯儲局好似加息，又好似唔加咁，貨幣政策好含糊，好唔應該。我哋唔同意咁嘅睇法，因為貨幣政策呢家嘢，理應藝術成份居多，最緊要係因時制宜，有啲時候含糊啲反而係好。

市場氣氛好多時只係信心問題。格林斯潘就好明白呢個道理。最鐘意唔聲唔聲，嚇你一驚。以1998年為例，格林斯潘於10月15日這個非議息日突然減息，就此令美國股市見底並反彈向上。有時又倒轉頭，以1996年為例，講完話市場上有好多"irrational exuberance"，恐嚇完你哋，然後就乜都唔做，又反而收到刺激市場嘅效果。

所以係股市風高浪急嘅呢段時間，我哋覺得聯儲局就算含糊些少，留有餘地俾自己其實都好合理。

老實講，呢個本應係普通賭徒就明白嘅顯淺道理。賭Poker嘅時候，你唔可以次次都唬人，或者次次都唔唬人。次次都唬人實俾人捉到；次次都唔唬人不如唔好玩？呢啲亦即係所謂虛則實之，實則虛之。只不過係讀死書嘅人鍾意懶醒，覺得咩都要清楚分析得到，先至搞到自己連基本步都唔記得咗啫。

港匯極強 ADR極弱 依家點算好？

港匯非常之強，但係ADR又非常之弱。唯有用今個星期一用過嘅策略，如果港股keep住跌五百點或更多，而細價股隻隻跌6、7%嘅話，就考慮走咗啲股票。其他情況聽日再即興創作。

補充些少，ADR跌，恆指聽日可以隨時照升。但係港匯強爆燈，港股反而狂插就真係少見啲。所以都仲係偏向睇好後市。

有一種情況好耐冇見，但係依家個feel都有少少似，唔排除聽日會出現，就係恆指狂插700點咁上下先，跌破支持線，兼殺晒嗰啲跌500點就即刻止蝕嘅人，之後先反高潮升200點收市，仲破埋近期阻力添。

所以就算聽日真係跌500點，我哋都唔會即刻止蝕住，會留意以上呢個情況出現。話時話，如果之前七、八年唔係親身經歷過呢種情況，再加上自己都試過低位『止蝕』嘅話，以上呢個考慮應該幾難寫到出嚟，段嘢背後真係有血有淚……

No Strings Attached 炒股模式

經常有人用「一夜情唔可以變情侶」嚟比喻股票買賣，話短炒嘅股票唔可以變咗長揸。不過，我睇咗《No Strings Attached》之後又有新嘅體會。

簡單來說，Emma同Adam係《No Strings Attached》套戲入面係一對sexual partner，講到明有性無愛，淨係做愛，唔會拍拖費事煩。兩人相處時間耐咗，日久生情。不過，Emma對大家當初唔拍拖嘅約定依然有執著。 

其實，既然睇法變左，就無必要執著於當初嘅約定。跌市嘅時候，短炒嘅股票唔應該變咗長揸。但係如果你改變睇法，認為跌市已轉勢為升市，短炒嘅股票又不妨揸耐啲。特別係，我哋難以係跌市預先講定股市幾時轉勢，但到股市升咗之後，買入又已經太遲，所以係呢個時候，短炒股票其實係一個長短棍兼施嘅策略。 

要留意短炒變長揸，重點在於升市會否為該股票提供額外上升嘅動力，亦即該股票本身是否好股票。如果你品味膚淺，習慣去Beijing Club、搵MK妹、玩one-night stand，咁我哋勸你都係咪用《No Strings Attached》炒股模式啦。順便提下你，係依個世界，「免費的最貴」！

美國唔加息 股市又跌 依家點算好？

日前講過如果估後市，睇美國會唔會加息根本係嘥氣。未議息前，一個二個又話要等聯儲局議息有定案，市場不明朗因素消除，股市先有機會上升。依家議息完喇，又話唔知聯儲局幾時先加息，變相又有咗不明朗因素，於是道指狂跌三百點。唔加息都可以係壞消息。所以人類真係好奇怪嘅動物，你太認真便輸了。

相關文章：美國議息結果對港股後市的無限可能

講返正題，依家ADR按比例跌緊450點，星期一點算好呢？觀乎星期五大部份股票嘅表現，我哋都頗肯定大部分莊家都幾睇好後市，預備揸返鑊鏟炒嘢。我哋睇得到，其他莊家都睇得到，市場本來應該已經有共識係度。點知ADR跌得咁勁，所以星期一早上，大約十點半之前，相信各個市場莊家都會你眼望我眼，睇定啲先算。我哋都會選擇咁做，未到十一點左右都未必有大決定。

唯一嘅大原則：如果恆指星期一維持係跌五百點以下，細價股又隻隻跌成5、6%，我哋可能又會走晒全部股票。所有其他情況，我哋暫時未有定案。到時再即興創作啦。

美國加息會否重蹈87年股市崩盤？

日前講到聯儲局加息與否，股市都是可升可跌。規矩是死的，股市是活的。真要被迫估市的話，我哋會參考歷史經驗。

以往25年經驗而言，聯儲局加息，短期可能會負面影響股市，但係長期影響未必大。

對上三次加息周期分別是1996至1997年、1998至2000年和2003至2006年，係三段時間入面道指都係反覆向上。

唯獨是1987年有啲特別。當時聯儲局已有三年無加息，而股市亦已經處於高位，格林斯潘當時一加息就觸發股市崩盤。

現時聯儲局維持0利率長達八年，破盡有史以來所有記錄，可是，股市相對之前高位已經下調不少。今次加息對市場衝擊會否如1987年般，將市場快速推向更深谷底，我們認為機會偏低。況且，觀乎1987年的例子，在聯儲局加息到真正大崩盤期間，市場需要時間去消化消息，一般不會即時裂口狂插。所以，就算大市真的要再插一鋪勁，我比較相信，作短炒嘅我哋能把握到一個時間窗口，作逃生之用。

美國議息結果對港股後市的無限可能

坊間有人話，恆指能否衝擊22000點還看聯儲局議息結果。我們認為此類論點值得商榷。

睇股票唔耐、又或睇嘢比較表面嘅人，可能會覺得呢類說話好有道理。不過，當你曾經信過呢類論點，兼且真金白銀咁掟過錢入股市裡面，經驗會話你知呢類論點真係嘥氣。

何解？因為：
1）加息可以話係經濟好，所以照炒；
2）又可以話加息令經濟減速，於是炒落去；
3）唔加息又話連聯儲局都唔睇好經濟，所以好大鑊，股市抵跌；
4）又可以話唔加息令經濟有潛力蓬勃成長，所以向上炒。

當你炒得股票耐咗，四種情況都分別見過多次之後，你就唔會點理聯儲局會否加息。畀你估中加息與否又點呢？你知股市聽日到底係升定跌？

技術分析最適合八十後

最近好多讀者pm問我哋嘅炒股方式，我哋一定係建議多用技術分析同埋睇盤路嘅做法。

呢個做法嘅好處係：唔使靠父幹，唔使靠內幕消息，自己一個宅男係屋企都搞得掂。

我幾年前仲讀緊中學嘅時候，人哋話基本分析先係王道。理由係：歷史悠久，格拉咸(Benjamin Graham)係30年代已經開始用緊，佢徒弟巴菲特(Warren Buffett)到依家仲係股壇屹立不倒添。此外，基本分析用上大量數學，好似係一啲好科學化嘅嘢。

炒股票耐咗，我反而覺得係21世紀技術分析先係王道。試諗諗，20世紀資訊並唔發達，互聯網係90年代末先至出現。嗰時之前用基本分析炒股票梗係發過豬頭啦。因為只要你願意下苦功，搵到人哋冇嘅資料，你就可以搶先一步買入優質股，機會仲多，多勞多得。然而，踏入21世紀，你搵得到嘅嘢，人哋都搵到。有父幹、有人脈嘅話，仲搵得肯定快過你添。你點同佢哋鬥呢？

技術分析可能因為畀人覺得唔夠科學化，所以唔多人採用。不過，實戰話比我知技術分析其實好有用。而且，大部份講基本分析係王道嘅都係上一代嘅人，佢哋用電腦計數、畫圖都唔夠我哋勁，梗係覺得技術分析冇用啦。佢哋根本就係「捉咗鹿唔識脫角」。如果我聽咗佢哋講，咁咪變咗以己之短，攻敵之長？我先無咁笨中計！

今日策略 2015/9/9

睇住而家ADR升緊130點……似乎個市聽日強勢機會稍大……65%機會左右啦。

咁嘅機會率，會選擇入咗市再諗嘅策略：即係聽朝個市定咗之後，會係10點至11點左右入晒100%股票！前提係，萬一有咩依郁，我哋係會勁快走人。當咩都無買過。

或曰：「買完又即走，咁不如唔好買？」問題係聽日升嘅機會大啲嘛。咁嘅情形，買咗先算啦。

到收市時跌返落嚟，自然係走一部分股票。如果係高位收市嘅話……喂！連續兩日大升兼高位收市，咁都唔當確認升勢嘅話，我仲使炒股票嘅？

有些莊家未夠成熟？

很多時見到評論話某隻股票係股災之中很有防守性，因為有莊家積極掃貨護盤。這類說話其實有以偏概全之嫌。

以我哋嘅觀察，之前兩個月嘅股災之中，五十隻細價股之中，會有三十隻有莊家不停撈底，另外二十隻嘅莊家會消失咗。結果呢？護盤又好，無護盤又好，五十隻細價股中絕大部分都係會係股災繼續插落去，最多係反彈得比較快啫。

我哋估計原因係，很多新晉莊家可能年資尚淺，唔知股市險惡。炒股票一個很基本的原則是：不要和大市鬥氣，亦即「順勢」。當整體大市向下跌時，一個人嘅力量係阻止唔到整個市場個趨勢嘅。唯一例外係個莊家真係圍晒接近100%嘅股票，咁你當然想個股價係邊都得啦，因為到時你就係整個市場。但係絕大多數細股睇嚟都唔係咁嘅情況。

莊家都係人。有啲新手莊家唔識點應付大跌市，結果好似初哥咁愈跌愈買，其實都未必無可能。

不過，市場上始終有部份莊家經驗較豐富和眼光獨到。呢啲莊家唔護盤還好，一見到佢哋開始護盤，其實距離市底真的不遠矣。如果真係要睇莊家盤路嚟炒股票嘅話，咁你都係睇啲醒嘅好。

默克爾先最識政治

有啲人話默克爾係女人所以比較感性，於是唔覺意做咗左膠嘢，就係放晒啲中東人入嚟德國。我並唔同意。事實上，默克爾最出名就係佢成日都企啱係群眾果邊。你可以話佢無政治家嘅魄力，去做啲吃力不討好嘅事，但係佢都唔知幾識玩政治。

估底迷思：基辛格的決策智慧

今日有五年無聯絡嘅舊同學T突然Whatsapp我，話有留意我哋嗰Page，覺得好正，仲問我咩位再入市好。我話我依家答佢唔到，因為我哋嘅炒股方式，基本上係「順勢」嚟炒。

雖然我好真心咁答個問題，但係亦知道自己講完等於冇講，都有少少覺得唔好意思。有啲人覺得，股市甚至係世事，因果清晰，只要事前詳加分析，結果係絕對可以預計到嘅。然而，中學老師Wood Lee都有教落：「能知三日事者，早已富貴千萬年」。世事好多時都係見步行步，摸著石頭過河，邊有得估咁多？

日前剛巧見到美國國務卿基辛格以下一段說話：

"requires [the] ability to project beyond the known. And when one is in the realm of the new, then one reaches the dilemma that there's really very little to guide the policy-maker except what convictions he brings to it.... Every statesman must choose at some point between whether he wishes certainty or whether he wishes to rely on his assessment of the situation.... If one wants demonstrable proof one in a sense becomes a prisoner of events."

意思係話，當你有足夠嘅資訊去下決定嘅時候，十居其十已經太遲。亦即是說，事前根本無足夠資訊予你詳加分析，所以即使分析能力最醒嘅人都無可能100%肯定到結果。好似近日股市一樣，你要首先見到恆指跌得好勁，啲股民開始自己嚇自己，之後先可以用經驗去估佢會跌落20500點，而且仲要係講唔實。個市跌都未跌之前，無知股民驚都未驚過，從何講起佢哋驚起上嚟，恆指應該跌落幾多點？你可唔可以預知三日之後會有感冒，所以食咗感冒藥先？

講開個市，見到ADR跌緊成400點，本週都冇乜策略好講。睇下個市幾時跌定咗先再補寫啦。暫時我哋覺得一、兩隻個別股仔或者可以炒下，但仍然係90%cash。

有眼不識富三代

上一次講到女同事C對我介紹嘅筍盤無興趣，最後當然無去到灣仔會展join我哋食飯啦。其實我有啲嘢應承得兄弟唔講就唔講。

我個兄弟真正最大嘅嗜好其實唔係Lego，亦唔係世界大戰，而係掩飾身份扮冇錢。佢係富三代，家族其實勁有錢，全香港大把地皮等著賣俾人。不過，做得富三代，對人生嘅追求自然同常人不同。佢對愛情尤其有著一份崇高嘅執著，希望女仔係愛佢而唔係佢啲錢，所以佢好鍾意係女仔面前扮冇錢嚟試探佢哋。

睇到呢啲情況真係好好笑。女同事C成日想要筍盤，偏偏送到埋嚟又唔識食。一見到人拍藝術片、食麥當勞，就好膚淺地當人冇錢，即刻唔要。唉！眼光如此短淺，就算筍盤真係送到埋嚟，都恐怕虛不受補，捱唔得耐啦！可惜！可惜！

坊間有好多女仔鍾意搵筍盤。不過，其實邊有筍盤咁蠢，會話你知佢自己係筍盤呢？大大聲咁講自己係筍盤果啲，你都唔好信啦。而且，一個筍盤除咗有冇錢，更重要係願唔願意對你好。如果揀男朋友次次都淨係問有冇錢，咁好多時你都會走寶。

睇得呢啲人生例子多，你會開始明白做人好多時真係好滑稽。所以做起人上嚟，真係應該睇開少少。炒股票亦一樣，千祈唔好為咗啖氣，輸晒啲錢。如果嗰女仔係傻嘅，你就要快快趣趣止蝕離場。千祈唔好係到呆等，等嗰傻女成長，等嗰傻女欣賞你。Hey, you deserve a better one! 傻仔，為咗啖氣，長揸隻跌緊嘅垃圾股，你會輸晒啲錢㗎。

件事令我諗起Don McLean首《Vincent》入面有一句歌詞。句歌詞係同Vincent講，「This world is never meant for one as beautiful as you.」即係你好掂又點？好多人根本都未夠班識得欣賞你。做人嘅嘢，盡咗力做，對得住自己最重要。

對恆指不停地估底

很多朋友問恆指底部究竟係邊。我哋之前估係20500點左右，暫時算守得住。可是世事無絕對，暫時我們在21000點區間只買入了少量股票，約佔全副身家的10%左右，相信會繼續增持但不會心急。其實我們對大市前景及市場氣氛仍有保留。

相關文章：為恆指作最壞打算

有見之前傑西李佛摩 (Jesse Livermore) 的文章有較多like，我想用李佛摩的另一個故事來說明我們對恆指的睇法。1906年，三藩市大地震後，李佛摩判斷美國經濟增長會因此而暫告一段落，於是四度沽空股市。李佛摩的確判斷正確，三藩市大地震確實很大程度上觸發1907年的金融危機。可是，危機由被觸發到爆發用了一年時間。李佛摩三度輸錢，到第四次沽空才贏大錢。總計他的進帳其實並沒有想像中多。

相關文章：Jesse Livermore的股災預兆感

我們想帶出的重點是：就算股神級的李佛摩對股市的轉折點其實都係不停靠估，而我們的作法也類似。我們知道恆指距離見底應該近了，但準確時間和位置無人說得準，所以都係摸著石頭過河。

話時話，基本分析中的經濟前景，很多時同股市有時間差異。很多朋友提供給我們不同的股市下跌原因，我們不敢說這些原因有錯。可是這些因素也許已經反映在近期跌市裏面，所以股市其實見了底也未可知。

油價有乜理由會大升

好多人見到巴菲特購入煉油企業菲力浦斯66，就係到亂噏話巴菲特睇好油價云云。我們恕難苟同：

（1）油價低才是對煉油行業有利嘅因素
對煉油行業而言，低油價代表低成本。油價升，開採石油嘅公司自然賺到笑，而被逼用貴油嘅煉油廠就死比你睇。呢個正正係上個年代嘅商品牛市中，中海油、中石油跑贏中石化嘅原因。因為相比起來，中石化有較多的煉油業務。有乜理由倒返轉，話成本高咗有利煉油廠賺錢㗎？

（2）地緣政治因素亦限制了石油價格的潛在升幅

因為受經濟制裁嘅緣故，伊朗一直以來嘅石油出口都受到限制。然而，當伊朗和P5+1國家達成核協議之後，屬什葉派的伊朗將有機會受惠於開採石油所得到嘅收入。相信很大程度上，這是屬遜尼派的沙地阿拉伯（伊朗在中東世界的最大死敵）為甚麼不再如往日般就石油價格下跌而減產。減產的話，油價保持高企，從而令伊朗受惠於更高嘅石油價格，咪即係替他人作嫁衣裳？

（3）頁岩氣及頁岩油技術日趨成熟

自頁岩氣及頁岩油技術成熟之後，石油以至其他化石原料的價格彈性應該會大幅增加。對比傳統油氣開採，頁岩油的投資門檻很低，且回報可以很快。每個油井壽命很短，一個井用完再鑽下一個就是了。油價下跌時更可以直接停工，從而令石油供應彈性大幅增加。

由以上三點，我哋相信石油價格在接下來幾年多數會窄幅上落，不會有太大變化，亦即是不會大升。相信巴菲特亦是看準穩定於低位嘅石油價格將有利煉油行業，才購入菲力浦斯66。

後補一句，我沒有詳細研究菲力浦斯66的生意背景。如果它的背景居然如斯獨特，作為煉油企業，於原材料價格高企時，反能夠賺取更多收入，請不吝指正。

灣仔會展Reunion

最近股市太悶，美女同事C今日無問我股票，轉咗問我有冇筍盤介紹。

我答佢：

「老老實實，我最近真係有個兄弟俾女飛咗，好傷心。佢堅筍盤嚟㗎。你依家去關心下佢，實掂！

我個朋友拍藝術片嘅，成日要飛來飛去。佢攞過幾次獎㗎，係有料之人。得閒佢最鍾意玩下Lego，睇下黑白片。佢同啲女仔嘅ice-breaking topic通常係講下點樣拆解南北韓危機，第三次世界大戰，同埋布拉姆斯點解勁過柴可夫斯基咁啦。

俾埋tips你。佢最鍾意帶女朋友去食美國菜，即係麥當勞咁話。佢個人有時都幾直㗎，有次一見到女朋友呀媽就話人好似叮噹咁樣。老實講，佢比我睇完女友呀媽啲相，我都覺得佢嘅評語係幾中肯，不過真係直咗啲。除此之外，佢基本上係冇乜缺點架喇！最重要係佢份人好專一㗎。」

美女同事C有啲晦氣咁答我：「咪玩我啦！又Lego，又麥當勞......」

我笑笑口講：「信我，佢係堅筍盤。係有啲藝術家脾氣，但除此以外基本上係一個純情小書生！」

女同事C：「拍藝術片邊搵到食㗎，有無啲專業人仕之類㗎？」

我：「佢真係筍盤嚟㗎。我今晚同佢會係灣仔會展食飯，得閒就join我哋啦！」

從女同事C嘅背影都feel到佢好失望。唉，我哋依啲讀男校嘅，應承得兄弟有啲嘢唔講得就唔會講，依啲叫brotherhood。可惜美女同事可能就咁miss咗嗰筍盤。依家到今晚十點半仲有時間，希望女同事會回心轉意啦！

（待續）

灣仔會展Re-U相關文章：《港大有史以來最大免費Reunion！》https://goo.gl/Cq3Y8j

悶熊飲茶

原先奢望中國或美國嘅救市措施，會於周末明朗化，結果都係無進展，又要靠估。

所以，本週暫時策略：因為恆指總算由20500點左右成功反彈，兼且中國同美國都有少少救市意欲，下跌機會不大。不過，要個市升亦都唔易，上星期五高開六百點收負二百點就係最好例子。照睇個市比較想慢慢淡返落嚟，悶走一班人先算。所以都係不變應萬變，揸住cash先。

相關文章：《本週總結 (2015/8/24 - 2015/8/28)》

或曰：「搞錯呀！寫篇咁嘅嘢叫人乜都唔使做，仲使睇你個blog嘅？」唉！癡人！君不見某個模擬炒股比賽，好多人係度買呢樣，買嗰樣，結果蝕到訓咗係度乎？時下好多後生仔鍾意轟轟烈烈咁輸錢，我就比較鍾意沉沉悶悶咁贏錢啦。

相關文章：《炒股有時，休息有時》

因為個市好悶，太無聊嘅情形下，去咗某Tea Shop買咗勁多唔同嘅茶葉返屋企慢慢玩。佢哋張茶葉清單，水蛇春咁長，有成一千款茶咁多。今日淨係買咗Celestial Empire Tea、Crystal Queen Tea、Crystal Water Tea同埋signature嘅1837 Black Tea，慢慢試到出年都未試完。但係有乜所謂？個市咁樣，只怕我仲可以佗佻番好一陣子。

當然，炒股票耐咗，好明白股票嘅嘢係never say never。如果個市幾時一好返，我哋都會即刻入市，再同佢死過。

聯儲局再試水溫 9月加息未成定局

聯儲局副主席費希爾昨晚提到，美國9月加息與否言之尚早。這裡有兩個重點：

（1）聯儲局擺明係度試水溫，即係佢哋自己都未決定應否9月加息。本來還奢望美國加息事宜有機會於周末明朗化，依家睇嚟，明晚都係要摸著石頭過河，盡估下個星期嘅炒股策略。

（2）美國經濟好是不容置疑。否則嘅話，低通脹，經濟差嘅情況仲諗加息，傻的嗎？所以一如既往，唔會太睇淡環球經濟。

前任美國財長保爾森(Hank Paulson)於2008年在國會出席聽證時就救市措施說過：

"If you have a bazooka in your pocket and people know it, you probably won't have to use it."

意思即係話，救市呢家嘢好玄。好多時你救市，只要俾到人知你係有心有力，個市已經自己識反彈。道指呢個星期嘅走勢就係好例子。但係中國不停咁暴力救市，「狼來了」太多次，依家再講似乎效用不大。呢個主要係信心問題，而信心係量化唔到嘅嘢。所以暫時好難估中國後市去向，一於睇埋聽晚再算。

本週總結 (2015/8/24 - 2015/8/28)

恆指大幅高開六百點後，持續向下，結果跌二百點收市，怎樣也算不上是強勢。即使恒指於20500點真的見底，相信接下來的升市都會以慢升為主，唔怕追唔到貨，大可安心揸cash過周末，賺少咗錢嘅機會唔大。另一方面，如果恆指其實係未見底，揸cash就更加冇得輸啦。

相關文章：恆指升勢未算強勁，持現金過周末以策萬全

周末要留意美國及中國會否陸續有救市措施推出。這些措施將會關鍵地影響中短期的股票走勢。不過，如我之前所講，可能聯儲局及中國政府根本都未決定要唔要救市，又或者點樣救市。所以星期五、六兩日急都冇用，都係要等到星期日，所有消息出盡先至再作決定。

我哋好耐之前已經提過，股票有啲時候係急都急唔嚟，Chur自己都冇用。所以，大家都係抖返兩日先算啦！Happy Friday！

相關文章：炒股有時，休息有時

本日策略 (2015/8/28)

昨日大市裂口反彈八百點。但係要留意，恆指並唔係由低位零點直線上升，而係裂口高開七百點之後就係高位徘徊到收市。成交並不算十分大。

我哋之前提過，恆指係跌浪中反彈四五百點係平常事，不需深究。但係七八百點係踩界情況，而我哋自己都估20500點係底，恆指係有機會真見底。

相關文章：跌市反彈四五百點係平常事

相關文章：恆指20500點可能見底

另一方面，恆指呢種反彈方式並唔係特別強。恆指裂口高開，再定鏡高位嘅例子有兩個，分別係2007年8月，同埋2011年12月1日，而後市分別只係反覆尋底，同低位橫行。如果大市堅係咁強嘅話，裂口高開七百點之後就應該起碼升到過千點先收市。

加上係周末，唔知大陸同美國會否推出任何措施救市，以及市場嘅相應反應，所以今日大致上嘅策略係：繼續持有大量現金，過埋周末先算。

咁如果聽日，或者下星期開市大升，我哋咪賺少好多？唉，怕輸嘅話，就自然要接受賺少啲嘅可能性。無得又要威，又要戴頭盔。世事邊有咁筍？

減息降準都冇用，依家點算？

中國減息降準，即日對大市刺激不大。讚吓自己講句，我哋昨晚係恒指期貨升六百點時已經提出過此可能性，真係算係咁啦。

相關文章：以美國98年減息看大陸減息降準

讚完自己，依家講講後市要留意嘅重點，同埋我哋嘅相應策略：

（1）美國何時加息至為關鍵
大市係高位嘅時候加息，原本照87年嘅經驗，係有機會整冧個市。但係點知息都未加，個市已經自己嚇到冧咗。世事嘅嘢，物極必反。會唔會聯儲局倒轉頭，唔加息住呢？呢點非常關鍵。如果咁嘅市況都照加息，恆指絕對有機會跌落17000點。唔加息嘅話，配合大陸減息降準，21000點可能成功築底。偏偏耶倫自己可能都未決定，我又點可能清楚過佢？不過，就算佢決定咗唔加息住，基於大陸不明朗因素始終較大，我比較相信股市唔會勁急速上升。所以，就呢點嚟睇，當大市唔係大跌都只會慢升嘅情形下，似乎等多一陣先入市會比較穩陣。

（2）唔好太睇小中國救市決心
大陸減息降準單一消息，雖然未夠為股市止跌，但係昨日提過，當幾個好消息連環推出嘅時候，股市就唔可以睇得太淡。中國既然肯減息降準，我覺得做人做到底，佢應該會接住推出更多救市措施。再加上我覺得美國係有可能延遲加息，恆指絕對有機會係21000點成功築底。一兩個月之後會唔會再跌過落去，就到時先算啦！

結論及相應策略：
我唔睇淡個市，但係美國如期加息始終有如刀架頭上。如果個市爆升機會較細，我多數可以遲啲先施施然入市嘅話，我又何必而家去博呢？所以結論係：繼續揸cash。除非恆指大成交兼大幅上升，否則我都唔會追入，睇多幾日先算！

以美國98年減息看大陸減息降準

我哋前幾日提過，恆指係21000點左右就算唔見底，都有機會先行整固兩三日。而家我哋已經到咗呢個水平啦。係呢兩三日，到底中國同美國會否有好消息刺激股市至為關鍵。隨時成為股市見底或者繼續狂插的觸發點。最壞情況，我哋相信係恆指會向下插到17000點。最好情況就遲啲再算啦。

相關文章：為恒指作最壞打算（一）

寫呢段嘅時候，啱啱睇到大陸減息降準，夜期暴升800點。

雖則我哋自己估大市係21000點左右見底，但係今次呢個利好措施夠唔夠喉，我哋反而講唔實。係風高浪急嘅日子裡面，同一個消息，股市隨時可以早上當利好，然後晏晝就話個措施都係唔夠好，投資者唔夠信心，於是大市即刻掉頭向下。

股市係底部，通常需要兩三個咁上下級數嘅利好消息連環推出，先至會有作用。舉例說，聯儲局係1998年9月減息0.25%，市場解讀為救市力量不夠而繼續狂插。但係當一個月之後，格林斯潘再突然減息0.25%，市場又突然覺得聯儲局救市決心好足夠，然後瘋狂暴升。你話吹唔吹脹？

總括嚟講，到底陸續嚟緊嘅消息係利好定利淡，同埋火喉夠唔夠，真係要靠即市feel吓先知。可能「暴力哥」李克強同聯儲局主席耶倫自己都唔知道。所以，除非大市聽日真係升得好勁，成交好強，咁就唔洗講嘢，追入返先算。如果升得少，我哋多數會繼續揸全cash，等多啲消息再作決定。少少升幅賺少咗就當買個保險。無謂迫自己賭大細咁去估。如果炒股票搞到好似賭大細咁，我唔好直接過大海去賭鋪勁，既方便又快捷？

睇淡就去揸Put輪？

日前有讀者問起，既然唔睇好大市，係唔係應該揸Put輪呢？

我哋唔建議揸Put輪，原因有幾個：

（1）錯咗咁點先？
係呢啲大跌市環境，股市跌得快亦升得快。萬一睇錯市，個市突然之間強力反彈，咁咪蝕到入肉？我嘅潛在利潤係咪真係咁大，值得我咁博呢？17000點就可能係，21000點就似乎唔係啦。但係暫時嚟睇，17000點先見底嘅機會又唔似好大。我就唔會咁博揸Put輪。

（2）引伸波幅(IV)扯高晒
大市未狂跌，你就未必敢講實係熊市。到大市狂跌時，Put輪啲引伸波幅又扯高晒。就算你冇睇錯方向，只要大市橫行兩、三日，你都可能要蝕一、兩成嘅引伸波幅價值，即係「未見官先打三十大板」。我哋就覺得唔係太值博喇。

（3）逃生門係邊？
就算係大跌市，有一兩日反彈番四五百點，係好正常嘅事。問題係，呢啲反彈嘅日子已經夠你隻Put輪跌兩成。咁止唔止蝕好呢？聽日係好有可能會再跌番㗎。但係如果你睇錯市，聽日再升五百點，到時隻Put輪已經蝕到四成幾。到時候點算好？

所以，除非你真係勁相信大市一定會狂插，否則嘅話，我哋覺得都係唔買Put輪好。當然，阻人發達猶如殺人父母，你真係好有信心嘅話，我哋都會講聲Good Luck嘅！

相關文章：為恒指作最壞打算（一）

本週策略 (2015/8/24 - 2015/8/28)

市場明顯已經轉勢。我哋亦已經由上週建議的「持有大量現金」變成「淨持有現金」。

相關文章：本週策略 (2015/8/17 - 2015/8/21)

就市場感覺嚟講，股票跌勢逐漸加速。但世事過剛則折，相信恒指係20000－21000點的範圍可能會掙扎一番。

暫時只會持有現金觀望。由於跌勢太急劇，我哋連所有超短炒都會停止。另一方面，實在估唔到中國政府會唔會有新嘅行政命令，又或者聯儲局因跌市而延遲加息？現階段唯有等佢哋做咗決定再算。

要特別提一句，因為我哋係短炒派，假如我哋見到個市唔知邊日反彈，我哋會好決斷咁即刻入番市。道義上，如果我哋一落決定，都會盡快係呢個blog提番大家，當然唔能夠保證任何嘢。

唉，細個時候炒股票，揸住現金就覺得自己唔係賺緊錢，一定會身痕想瞓身入番市，結果輸突。但係當炒股票耐咗，你開始對自己有信心，知道自己可以持續賺錢嘅時候，你就自然可以坐定啲架喇。Good luck！

為恆指作最壞打算（一）

毋庸置疑，恆指近期顯現極度弱勢。對於後市走勢，我哋估計會有三種可能性：

（1）恆指跌落約20500點。
（2）受大市氣氛，以及投資者對美國即將加息嘅反應影響，恆指跌落約17000點。
（3）眼鏡碎滿地，恆指一直向上升返轉頭。

暫時相信（1）最有可能發生。

（a）睇返恆指歷史，一般大熊市可以下跌六成（1997年、2007年），小熊市可以跌四成（1994年、2011年）。不過，大熊市一般會配合非常大型嘅經濟因素轉變，比如說1997年的亞洲金融風暴、2007年的次按危機。相對之下，1994年及2011年嘅調整只係因為經濟上短暫放緩而造成。暫時大圍嘅經濟情況與1994年及2011年似乎比較相似。

（b）假如現時恒指如小熊市般下跌四成，其實正正就係17000點，即係（2）。但係（2）似乎係極端情況。因為香港自2007年之後，股市波幅似乎逐漸與成熟市場睇齊，就算遇上熊市或大調整都只係會跌兩、三成左右，即係大約（1）嘅情況。

（c）市場氣氛此刻明顯好弱。相信股市會繼續尋底嘅機會居多，（3）嘅可能性非常細。

（d）不過，建議始終不宜將中國股市看得太淡。中國股市同其他成熟市場不同，中國政府有心嘅話，隨時可以用「黑天鵝」式嘅行政手段強逼股市上升。到時香港到底會跟住中國股市上升，定係話為咗現金周轉而狂拋香港股票，真係天知曉啦！

所以我哋估恆指係20500點左右有機會見底，唔見底都至少會係嗰個位掙扎下先。

（2）嘅情況未至於無可能，只係暫時冇逼切性，決定幾日後再講。聽日會講下週展望及策略！

炒家的觸覺（二）

另一個例子，1907年傑西李佛摩（Jesse Livermore）係佛羅里達州嘅Palm Beach渡假。嗰時股市係咁狂升，偏偏有一日，李佛摩望住啲股價跳動，突然之間感覺好唔對路，就打電話去賣晒所有股票，兼沽空埋嗰市。之後當然就係遇上1907年股災，李佛摩贏到盆滿缽滿。

事後李佛摩無俾到具體解釋，只係話大眾係股災發生前嘅心態通常都差唔多，而股災前從股價跳動得到嘅感覺亦係好相似。嗰感覺相信係間接地感受緊股民果時嘅心理狀態。

我係2008年第一次睇傑西李佛摩嘅講法，都唔明佢講乜。「既然股災前大家嘅心態都差唔多，點解就唔可以歸納幾點出嚟，要扮神秘咁呢？」依家人大咗，股票經驗多咗，我就開始明明哋，情形有啲似追女仔。

你理智上會唔明點解嗰女仔會揀果條衰仔，而唔係揀你。條衰仔擺到明真係衰到貼地，無優點㗎喎！但係潛意識入面，你晨早感覺到佢最後唔會揀你。你feel到啲嘢但係又講唔出，就好似股災前李佛摩嘅感覺。如果你好似李佛摩咁有股災預兆感，行事無解釋其實無問題。快快趣趣止蝕離場，無謂同啲傻妹傻鬥傻，嘥晒自己啲錢同精神。

相關文章：炒家的觸覺（一）

炒家的觸覺（一）

日前講起炒家的經驗好重要，接下落嚟兩日我想舉幾個實際例子俾大家聽。

好多人知道索羅斯係大炒家，無論佢寫任何書，去任何地方做演講，佢都會講佢嘅Reflexivity理論－即係市場並無一個客觀嘅合理價值，股票不合理嘅價值本身亦可以吸引更多人買入股票，從而將價值合理化。

雖然我同意索羅斯講嘅嘢，但係佢個仔（Robert Soros）所講嘅反而仲吸引我，以下呢番說話似乎唔太多香港人知道：

"My father will sit down and give you theories to explain why he does this or that. But I remember seeing it as a kid and thinking, Jesus Christ, at least half of this is bullshit. I mean, you know the reason he changes his position on the market or whatever is because his back starts killing him. It has nothing to do with reason. He literally goes into a spasm, and it's this early warning sign."

索羅斯本人並無點樣否認呢一樣嘢。意思即係，索羅斯講嘅嘢未必係錯，不過講到最後，似乎都係佢嘅第六感至關重要。

淡淡定，有錢剩？

一個股票初哥好容易犯嘅錯誤就係所謂「睇定啲先」。但係當你揸住股票嘅時候，「睇定啲先」其實根本就係「決定」唔賣，反之亦然。唔做決定都算啦，自己做咗決定都唔知就真係天真嬌啦。

咁嘅錯誤最容易發生係大調整頭兩三日。初哥見到調整，十居其九都係條件反射，話冷靜啲，睇定啲先。於是當佢真係睇定啦，嗰市已經跌到癡咗線，冇埞好走。邊有比你睇定咗再慢慢走咁筍嘅事呢。又或者好似依家咁，每日陰啲陰啲咁跌，每日都「睇定啲先」就會比人陰乾咗。

「喂！老老實實，吓吓都一跌就走，點炒股票呀？咪好多升幅都食唔到？」係㗎，無可能次次都估中邊次調整係堅，邊次係流。不過，只要我哋避到股災嘅次數多個錯失好機會嘅次數，又或者錯失嘅根本只不過係糖仔，我平均都係賺錢。至於命中率嘅高低……講經驗啦。

至於無經驗可以點？咁就要記住睇住我哋嗰 Blog 同 Facebook Page 啦！由呢個星期開始，每嗰星期一我哋都會寫一段本週策略供大家參考，有咩問題亦都不妨message我哋，大家切磋一下。鐘意就記住 Like我哋，比啲鼓勵我哋啦！

贏咗啖氣，輸晒啲錢，值得咩？

炒慣股票嘅人，就算唔信 Effective Market Hypothesis（有效市場假說），都會相信自己某程度上比其他人更了解股市。

好可惜，股票市場其實係投票市場，而大部分炒股嘅人都係傻瓜。就算你好有智慧，覺得市場根據研究應份要點走點走，依嗰研究其實對你無乜好處。因為股市係由大多數人話事，亦即係傻瓜話事。你可以好理智咁同傻瓜理論，好似眾人皆醉我獨醒咁，但係最後傻瓜照舊咁傻，而你就輸晒啲錢。

舉例說，恆指係牛三時期理應支持到大約20倍嘅市盈率，就算如美國呢啲成熟股票市場，依家都已經去到成17，18倍啦。但係恆指掂到11倍就硬係要跌返落去，有乜道理好講啫。你可以繼續好理智咁話恆指54000點先係合理水平，然後繼續蝕錢。咁又何必呢？

你當初炒股票，到底係為咗賺錢定為咗啖氣先？傻瓜要走咪由得佢。睇在自己荷包份上，佢哋話點就點囉！唉！對住啲傻瓜其實有理說不清，我就寧願跟住佢哋傻，股票理論完全錯晒又點話？偏偏咁先至賺到錢，真係吹脹。

本週策略 (2015/8/17 - 2015/8/21)

市況淡靜，成交稀疏，睇細價股盤路似係散戶散貨退場居多，而莊家一般被動式維持秩序。

短期似乎冇大跌嘅危險，但係急升嘅機會亦不大。先留現金，等大市上升先追入似乎比較穩陣，無謂冒不必要嘅風險。

暫時持有大量現金，見有股票超賣即短炒一至兩日。除此之外，大致上敵不動我不動啦。

細成交就代表淡市？

細成交並唔應該係睇淡大市嘅原因。股市升勢初期通常都係無聲無息，慢慢咁升，成交唔會太大。

好多人嘅錯覺，以為升市一定要配合成交放大先係堅料。其實要視乎你講緊嘅 time frame 有幾長。

2007年6月，恆指以千億破紀錄成交突破21000點，升到23000點就已經掉頭回落到19300點。

2008年4月，熊市中嘅恆指以400點及頗高成交突破橫行區至25600點，點知一個禮拜就係26300點見咗頂。

今年4月就更加唔駛提。恆指強力爆升到27000點，但係去到28000點就無力為繼。

結論係，大成交配合升市，的確會營造一段升勢。但係時間未必長，而且好有可能會跌破返爆升前果個位。反而係低位，細成交更有可能係漫長升勢嘅開始。至少唔可以算係坊間所講嘅淡市訊號。

真·跌市嘅逼切感

之前講到真正跌市係會好有逼切感，呢個係我多年來嘅經驗。

通常真正大跌市出現嘅時候，每個人都會有股票係手，又會唔捨得放，跌起上嚟就有逼切感啦。

六月廿九日我放緊 AL，但係嗰日我都特登返公司食某女同事嘅 Farewell Lunch。當日早上恒指跌近500點，其實我同我拍檔都已經聞到陣燶味，因為細價股跌到凸晒，隻隻都跌近8 －9%。

一般人（尤其 Laymen) 通常都係大牛市後期先追入，每日都+1%咁，好辛苦去賺10%返嚟，面對單日一個9%嘅大跌係絕對唔會想走股票嘅。即使唔係 Laymen 都好多會係咁。大跌嗰幾日，好多玩財技嘅財演都話不妨揸住距離殼價淨值近嘅股票，話有防守性喎。問題係，如果跌9%呢日你無走，之後每日再跌15%你都唔會走架啦。萬一嗰跌市真係瘋狂嘅話，好有防守性嘅股票都一樣可以無底線咁跌。

所以，當我嘅同事都食緊肯德雞，聰聰食緊蘑菇飯嘅時候，我就係咁走晒手上嘅股票，再若無其事咁同嗰女同事講聲 Good Luck。

好多時，男仔炒股票賺錢會覺得自己好型。你覺得自己終於可以曬命，俾班傻仔同啲冇taste嘅ex(s)睇下你依加幾咁叻。結果咁就仆街鳥。因為當你放咗自己嘅面子係股票上面，頭幾日大跌你一定唔會肯走，之後都唔駛走架啦。唉，所以做人真係唔好同啲傻仔一般見識，好多時上咗心就賴嘢架啦。

工程師通常不是炒股高手？

同個friend講起，發覺好多工程師朋友炒起股票上嚟都冇乜運行。

其實我覺得係同佢哋受嘅教育有關。工程師做嘅都係一板一眼嘅嘢，if-then-else果個邏輯係好清楚嘅。但係炒股票同拍拖好相似，你無可能簡單用幾條公式嚟處理咗件事，係無有定法嘅。譬如向下炒嘅做法係前個十年好流行，好多人都唔敢掂細股。點知你唔掂就啱啦，莊家瘋狂收貨，大概係2013年起，絕大部分嘅細股都係淨係向上炒。

因為我一直都係炒細價股為主，我仲記得果個時候同friend傾起，唔知到底係我哋好彩定話細價股向下炒嘅做法真係開始式微。好似買親嘅細價股大部分都係贏錢收場，印象中真係未試過被人向下炒到甩褲。

如果有人一味教條式咁話細股風險高，要穩健投資大股之類嘅話，呢兩年好大機會都係硬膠膠唔知做乜膠，因為恆指大致上都係死咗係二萬幾千點冇郁過咁滯。

講到炒股票，有時真係要洗濕咗個頭，之後先再諗點算。有啲炒股票嘅仆街場景，真係要賴過嘢先至識得點應付。偏偏工程師多數冇呢個mindset。尤其是係香港做工程師，多數都係穩穩定定嘅專業人士咁上下款，比下有餘，係舒舒服服嘅生活下真係唔會有係股市上trial-and-error嘅打算。但係其實不停咁仆街，先係長遠學炒股票賺大錢嘅方式。

恆指見底未？

呢個問題之所以難答，係因為恆指係大跌完結之後，起初上升嘅力度一般都好弱，所以初期幾難判斷到底係一個小反彈定話係升勢嘅開始。真係要估嘅話，我估會有下列三種可能性：

（1）恆指用兩三個月時間雙底反彈

呢個基本上係七月一開blog嘅時候嘅講法。恆指有可能做出如2008/2009 或 2002/2003年的雙底反彈。但係因為今次嘅跌勢相對較弱，可能營造雙底嘅時間亦都唔長。就算跌，如果冇其他突發嘅因素影響，相信跌都唔會太急。咁可能係九月左右稍為點一下二萬二千點之後就可以緩慢重拾升軌。

如果係呢個情況，咪好似我成日咁講，揸住股票，但係淨係短炒囉。因為多數跌得唔急嘅緣故，就算要走都應該有得走。

（2）恆指根本已經見咗底

咁就更加應該揸住啲股票啦。有可能而家係類似2011年尾嘅走勢，明明已經見咗底但係嗰市仲係吊吊揈咁，今日升三百點，聽日又跌返三百點。相信係…雖則聰明錢已經入咗貨，但係散戶一路唔入市嘅情形下，莊家都好難唱獨腳戲。

（3）我估錯市，恆指一路下跌

我都係人，有時估錯市有幾出奇啫。好過我吓吓扮曬勁係度亂咁吹水，害到人咪仲衰。但係暫時我覺得機會唔大，因為跌市嘅感覺應該係多啲逼切性，唔多似係咁，呢個可以聽日再講。總結來講，暫時都係超短線炒下股票波幅先啦。

美國絕大機會通過伊朗核協議

美國民主黨參議員舒默(Chuck Schumer)剛表示不會支持奧巴馬的核協議。由於共和黨早已表明不支持協議，而舒默又是民主黨的重量級成員，很多人擔心協議將不會通過。

其實我睇成件事係政治表態居多。成件事嘅基本玩法係：協議係國會參眾兩院絕大機會不會獲得通過，因為兩院依家都由共和黨把持。但係奧巴馬作為總統可以『反對佢反對』。而假如國會想再『反對奧巴馬反對佢反對』嘅話，參眾兩院今次就分別需要三分之二嘅票數通過先至有效，要維持最起碼三份之一嘅支持票絕對係民主黨嘅能力範圍之內。

所以，舒默同其他日後將會轉軚嘅民主黨員應該都係想向佢比較保守嘅支持者做下show咁啫。橫掂多佢哋一票唔多，少佢哋一票唔少。協議通過嘅大局相信唔會有咩改變。

其實另一方面，聯合國安理會已經以15－0嘅票數通過咗核協議。所有美國以外嘅國家已經準備好同伊朗再次做生意。美國要否決呢個協議已經變成咗佢哋自己嘅事，其他國家會理佢先奇。共和黨如果真係要拉倒呢個協議嘅話，相信係2016總統選舉之前呢年半佢哋會見到同埋要承受好明顯嘅政治後果。

http://www.dw.com/en/battle-over-iran-vote-in-congress-heats-up/a-18638913

小龍女的持股方式

今日好多中國概念股或者純炒股升得幾勁。唔排除超短線嘅一兩日會回返少少，但係中線個市似乎有返炒作嘅機會，因為市場上有一部分人逐漸重新炒作股票。睇下夠唔夠候啦。

想當年小龍女係重陽宮單挑西域三大高手，用上咗一招天羅地網勢，將地上數十把長劍隨拾隨拋。小龍女手中每一刻都有劍，又每一刻都冇劍，順手抓到劍柄嘅話又可以刺出幾劍，靈台澄澈，心無半點雜念。其實近期我哋炒股票又何嘗不是如此？我哋做嘅就係短炒股票，每隻股票通常唔揸多過三日。我哋每一刻都有股票，但係又唔算持有啲咩股票。是但邊隻股票升得快啲嘅話，我哋亦都唔介意揸多佢三兩日。

暫時亦都會keep住呢個炒股模式。個市真係升嘅話咪揸住晒手上嘅股票囉。長短棍有得揀。幾好？

  

啪咗丸仔嘅中國股市

中國股市嘅行政監管手段就好似啪咗丸仔咁樣，短期之內只怕…唔會有咩事。但係長遠嚟講咁樣嘅發展模式自怕會係七個蓋冚十個煲，遲早搞到唔得掂。

英國人係第二次世界大戰之後，很大程度上因為受夠了嘅關係，亞洲戰線都未打完嘅情況下已經拉咗邱吉爾下台，換來由艾德禮的工黨將英國轉變成一個福利國家。之後嘅經濟發展亦都一直遲緩兼落後歐洲鄰國，直到戴卓爾夫人上台情勢才有改變。

六十年代詹森總統帶領嘅美國係越戰泥足深陷，一方面佢要增加軍費開支，但係又唔肯係國內實行銀根緊縮嘅政策，結果銀紙氾濫好大程度造成咗七十年代嘅高通脹。偏偏尼克遜採取掩耳盜鈴嘅價格管制措施扮睇通脹唔到，管呢樣，管嗰樣，於是迎面而來嘅係整整一個年代嘅經濟放緩。

我並唔係想話政府實施任何管制都唔得，非常時期行非常政策係絕對合理嘅事。問題係…嗰啲係唔係真係非常時期啫。任何實質上係價格管制嘅措施都會對市場競爭力有一定影響，以上兩個例子可以清楚顯示這一點。而中國政府對股市實施呢啲管制嘅力度，係大到基本上我諗唔到佢可以點樣樣返返轉頭。就算中國股市俾阿爺包咗底唔駛死，似乎都唔見得有好大嘅誘因可以叫人短期內繼續將大陸股票向上炒。

當然，講完一大輪嘢，其實對我嘅股票操作係冇乜影響嘅。吹水唔抹嘴啫。喂！個市唔升我就炒唔到股票，咁我咪好廢！呢個擺明唔係事實啦。事實係我可以繼續短炒股票波幅，如果唔係，之前兩年恆指都係二萬幾千點徘徊嘅時候，你以為我食穀種呀？

http://hk.apple.nextmedia.com/realtime/finance/20150808/54064932

房謀杜斷

唐朝唐太宗時期有所謂「房謀杜斷」，所謂「房知杜之能斷大事，杜知房之善建嘉謀」。其二人各有所長，互相配合。房玄齡講完一大輪嘢，if-then-else完之後就會同唐太宗講話佢要講嘅已經講晒，但係揸主意呢家嘢都係搵返杜如晦嚟做啦，從此，房玄齡同杜如晦就協助了唐太宗成就咗貞觀之治。

Liquidity Provider 同埋後面相關嘅嘢，其實亦都係兩個人嘅集體創作。一個講就天下無敵，但係做就…另一個唔知點解聽完就自然知要點做，真係寫個服字比佢。就算呢個blog嘅Facebook廣告都係一個講完可以點做點做，另一個再決定幾時做同埋對咩人做。

睇得呢個blog多，你可能會覺得好似有個人精神分裂成日係度同自己鬧交咁樣，原因就是如此。唉，之但係其實炒股票，溝女甚至做人又何嘗不是如此呢？

希望我哋可以藉住呢個blog俾到一個refreshing嘅感覺大家啦！

轉工

最近好多同事轉工。

見到有啲同事轉咗工之後high high哋，人工升咗三四十個巴仙就以為自己天下無敵，即刻唔識人咁樣。Cher！打AOC咁啫，Dark Age升Feudal有幾難呀！Computer (Easiest)咩！過到Castle唔死先算啦！

自己好似掂咗就即刻唔認人呢家嘢，我係17，18歲嘅時候做嘅。點知你班友成30歲人先至做啲咁嘅嘢，未戒奶咩。

其實呢度有兩點值得反思。

首先，時移世易，時代不斷變緊。到底短期轉到一兩份筍工係咪就等於on the right track，我好有保留。做人嘅方法：打仗嘅時候，生存到已經好好嘢；經濟起飛嘅時候，老實打工都夠你過世；係現代香港，當四周圍都係透明嘅glass ceiling時候，仲打算認真同佢打成世工其實真係好白痴奴隸嘅諗法－假設咗人哋比你打成世工嘅話。

帶出嘅第二點，其實一個人嘅事業係三十幾歲先至係最大嘅難關。Officer仔要升做Manager有幾難啫，Manager之後升唔升到上去先係難關。做Accountant頭個幾年實冇嘢嘅，正正常常Manager級數點都會有。只不過如果你同人唔啱嘅話，炒又唔會炒你嘅，但係你會比人hold咗係度，睇下幾時悶到你走咁解啫。仲有，經濟OK時候還好，十年一次經濟衰退嘅時候，全部銀行同一時間裁員，裁嘅最多就係嗰啲唔上唔落嘅中層人員，一唔好彩俾人炒左既話，果幾年邊會有空缺比你搵到？過得幾年，人哋都請fresh grad唔再請返你啦。諗定遲啲係邊度開鋪賣魚蛋仲好啦。

打工係呢方面都幾似炒股票。大牛市賺到錢有幾難啫，熊市狂跌都唔輸錢先至係堅料囉。

中國面臨中等國家收入陷阱

各種蛛絲馬跡都顯示中國的經濟正在急速冷卻，經濟成功保七真係信不信由你。

http://www.the-american-interest.com/2015/08/03/chinas-auto-sales-slump-tip-of-the-iceberg/

其實就算真係嘅話，蘇聯前車可鑑，中國的經濟發展亦都不一定是一帆風順。五十年代蘇聯嘅經濟發展非常厲害，當年好多人將蘇聯同美國嘅經濟增長率to the power of X再結論話X年之後蘇聯一隻手指尾都可以捽得死美國，好多蘇聯人仲係度自high添。但係原來最後個增長率係keep唔到嘅。

事後睇返落去，蘇聯只不過係二次大戰受到太大重創，有好多output potential用唔得著，之後幾年只不過係好快咁用返呢啲potential咁話啫，結果用完就無啦。

另一方面，想想近代能夠突破中等收入陷阱嘅國家似乎都一定係有番咁上下民主同法治嘅社會。道理當然係因為高等收入嘅重要條件就係要有創新同技術發展，而民主同法治正正係保護呢啲發展嘅重要基石之一。

唔...如果你覺得中國係有民主同法治嘅話，咁你當我無寫過呢段嘢啦。但係你問我，如果中國係無民主同法治嘅情況下，可唔可以創造世界第一，都成為一個成功嘅已發展國家呢？Well...世事無絕對。我都想我鍾意果個妹妹仔回心轉意鍾意返我，但係我唔會奢望囉。（其實係唔係好事都好難講。）

中國誤判南中國海形勢

表面上，中國趁著美國由民主黨執政嘅時候搶住起人工島係賺咗啲甜頭。不過，成熟嘅民主政權對所有大事慢一步反應係經常發生嘅事，因為人好自然都係傾向一動不如一靜，但係咁樣唔等於佢哋同意同默許呢啲事情發生落去。

舉例說，民主黨甘迺迪係1961年就任總統之後對蘇聯嘅態度一開始都係得過且過。甘迺迪對蘇聯係柏林築起圍牆基本上不聞不問，整個美國政府私底下更反而覺得係一件好事，因為圍牆阻止咗東柏林人大舉逃離東德，反而變相解決咗美蘇之間嘅一大難題。但係逼虎跳牆，係1962年反而係甘迺迪阻止咗古巴導彈危機。

再者，奧巴馬係2011年先提出咗美國要重返太平洋，轉頭面對中國咁實在嘅軍事挑戰都唔企出嚟嘅話，人哋會覺得你有得一次就可以有第二次，美國係太平洋盟友之間嘅號召力就會大大減低，所以美國係呢件事情上面讓步嘅空間其實有限。

中國係南中國海上嘅做島工程隨時係一條單程路。

http://thediplomat.com/2015/07/south-china-sea-satellite-imagery-shows-intensive-chinese-building/

時移世易

美國由1960年起已經對古巴實行禁運。不過希拉莉最近係佛羅里達州演講時，公開支持取消禁運。這除了是要突出自己與共和黨不同，也與佛羅里達州的人口結構轉變有關。 自古巴於50年代革命後，好多流亡海外嘅古巴人都去到美國佛羅里達州定居。佢哋大部分都係共和黨同埋禁運嘅忠實支持者。但係事過境遷，五十幾年後嘅今日，呢啲人已經逐漸離開人世，佢哋嘅後代因為冇親歷過革命嘅緣故，自然對古巴有唔同嘅睇法。 呢件事十幾年前係無可能會發生，連希拉莉自己都承認佢係90年代支持老公實行禁運。所以世代變更，即係generation shift之後，好多發生緊嘅嘢真係唔好當係老馮。

http://www.theguardian.com/us-news/2015/jul/31/hillary-clinton-cuba-embargo-outdated-policy

炒股有時，休息有時

股票表面上每日都有上有落，但係整體嚟講其實一般每年只有大約一半嘅時間適合炒股。另一半嘅時間，你會發現自己炒來炒去都係得個桔。今日賺咗嘅聽日蝕番晒。不如返屋企訓覺好過。

舉例說明，相信無人會反對香港係2006，2007年係置身於一個大牛市當中，但係就算係嗰兩年，都係只有下半年升，上半年都只係浮浮沉沉。

又譬如說，恆指係舊年928佔中之時大致已經見底，但係對大部分細股來講係第四季其實仍然尋緊底。

或曰，咁係因為你炒嘅係細價股啫。呢句說話其實只係啱到一半。因為就算你用其他炒股票嘅方式，都唔見得一定可以一年十二個月都賺到錢。天外有天，我唔敢講呢件事一定冇可能，但係我自己覺得機會好細囉。

不過，唔同嘅炒賣方法似乎可以係唔同時間攞來用，咁變相一年唔駛有一半嘅時間食穀種，前題係你可以reasonably估到咩時候用邊種炒股方式。其實我哋都一直做緊呢樣嘢。

見到個市呢排好淡。我比較相信個市起碼要返一兩個月嘅時間先至會好返啲。所以chur都無用，呢兩個月我基本上都會放鬆番啲，飲啖茶，食個包，或者試下炒下美股咁樣。前幾個月，我啲同事話我炒股炒得太狼死，應該要放鬆番啲。問題係機會唔係成日有。上幾個月都唔chur行炒股票仲等幾時？但係依家可能真係應該抖抖啦。

Disclaimer：我唔排除我會睇錯市，好出奇咩？如果我見到個市復原得快嘅話，我都會好唔客氣咁飛身入市再同佢死過。

標準資源(91)被密密收集？

雖則我覺得股票短期升嘅機會唔高，但係大市絕對有可能已經見咗底，係呢幾個月會唔會係密密收集期，等到年尾再炒返轉呢？

咁嘅情況下，供股或者配股嘅股票有機會再次行運。標準資源(91)今日宣布以供股價0.168元供股，現價係0.202，如果係之後幾日可以跌到去0.160左右而市況OK嘅話，可能可以作為底價買入博升。真係勁跌到0.145左右嘅水位嘅話就考慮止蝕。

當然，都係我句口頭禪，best guess嚟架咋。睇錯咗嘅話我自己都會仆到咁走。祝大家好運！

恆生指數可以橫行好多年

恒生指數自成立以來都係以一浪高於一浪嘅形狀向上升。有70年代嘅1700點，80年代嘅3000點，90年代及千禧年頭嘅17000點同埋2007年嘅32000點。細數字我就唔去查啦，查咗對我嘅推論都唔會有影響。

好多人於是就老馮覺得恆指下次要升到上50000點。話晒係50000點我哋嘅P/E都係18倍左右啫。以往股災前恆指可以去到成22倍P/E添啦！50000點有幾難呀！

我的確唔排除恒指話咁快就升到50000點呢個可能性，但係呢度有個羅素的雞嘅問題。以往係咁唔等於以後都係咁。恆生指數其實可以係20000點至30000點呢啲位橫行多幾年。

舉例說，美國道瓊斯指數係二次大戰之後大升，係70年代初做過1000點嘅歷史高位之後，整個年代都係係呢啲位置度徘徊，你估股市唔升係犯法架咩。然之後係80年代先重新開始瘋狂上升到2000年嘅12000點，兩個年代加埋做咗十二倍嘅升幅。

又譬如說，中國經濟係千禧年代蓬勃發展，但係上證指數反而係2000年頭嘅2000點跌到落去2005年嘅1000點，之後先至反高潮用兩年嘅時間爆升六倍到2007年嘅6000點埋單。

我用呢兩個例子想講嘅係：天要下雨，娘要嫁人。你鍾意嘅傻妹硬係要跟咗個傻仔走佬你都無法。有時世事嘅嘢真係有咁多道理好講咩！果排大家唔啱feel，唔想炒股票咪唔炒囉！邊洗理由㗎啫！

如果冇記錯，Barton Biggs係Hedgehogging入面都有提過美國股市係70年代唔肯升嘅現象。基本上佢都係好大方咁講，長期有時真係好難講個市幾時會係漫長嘅上落市定係大單邊市。唯有睇住個市做人，佢要升咪升囉。

有啲人試圖解釋：70年代嘅美國同千禧年代嘅中國嘅通脹都係非常高，從而去推論點解股市係呢啲時間並唔受人歡迎。亦有人話係千禧年代嘅中國，做生意賺錢快過炒股票多多聲，使鬼炒股票咩！

我唔否認呢啲說法有佢嘅道理，只不過，我都係覺得，It rises when it rises。你知道恆指有長期橫行嘅可能性就夠啦。之後咪看著辦囉。使乜諗咁多啫。

講一大輪，其實係想講恆指有機會係好似熊市三期咁係呢啲位徘徊幾個月先至再炒過，唔好以為佢一定要好快咁升。但係呢樣嘢過幾日再講啦！

上帝的衣角

鐵血宰相俾斯麥講過：A statesman must wait until he hears the steps of God sounding through events, then leap up and grasp the hem of His garment.

意譯嘅話，即係：有架火車係你前面，你知佢遲早會開，但係又唔知幾時開。但係你又何必去估呢？一聽到火車響汽笛就跳上車咪得囉。

其實炒股票又何嘗唔係呢？股票聽日係升係跌，只怕阿爺都唔知道，如果唔係之前都唔會搞到要暴力救市咁狼狽啦。其實我自己炒股票嘅方式好大程度上係後發而先至，賺少些少都唔緊要，睇定個市點郁先，但係一有返咁上下把握就會飛奔撲入個市，做咗買賣先至再諗。

所以係呢個blog入面，每日你都會見我擺啲if-then-else嘅情形出嚟。我唔會特別估聽日個市會點郁，但係我會將每組可能嘅情形同相應嘅策略都擺晒出嚟，然後再睇餸食飯咁啦。（雖然我自己多數有心水，但係我又何必去估呢？）

我唔係太覺市面上有人用咁嘅方式嚟講股票，所以係度做過新嘗試。希望大家會鍾意啦。