另一個例子，1907年傑西李佛摩（Jesse Livermore）係佛羅里達州嘅Palm Beach渡假。嗰時股市係咁狂升，偏偏有一日，李佛摩望住啲股價跳動，突然之間感覺好唔對路，就打電話去賣晒所有股票，兼沽空埋嗰市。之後當然就係遇上1907年股災，李佛摩贏到盆滿缽滿。
事後李佛摩無俾到具體解釋，只係話大眾係股災發生前嘅心態通常都差唔多，而股災前從股價跳動得到嘅感覺亦係好相似。嗰感覺相信係間接地感受緊股民果時嘅心理狀態。
我係2008年第一次睇傑西李佛摩嘅講法，都唔明佢講乜。「既然股災前大家嘅心態都差唔多，點解就唔可以歸納幾點出嚟，要扮神秘咁呢？」依家人大咗，股票經驗多咗，我就開始明明哋，情形有啲似追女仔。
你理智上會唔明點解嗰女仔會揀果條衰仔，而唔係揀你。條衰仔擺到明真係衰到貼地，無優點㗎喎！但係潛意識入面，你晨早感覺到佢最後唔會揀你。你feel到啲嘢但係又講唔出，就好似股災前李佛摩嘅感覺。如果你好似李佛摩咁有股災預兆感，行事無解釋其實無問題。快快趣趣止蝕離場，無謂同啲傻妹傻鬥傻，嘥晒自己啲錢同精神。
沒有留言:
張貼留言