細成交就代表淡市？

細成交並唔應該係睇淡大市嘅原因。股市升勢初期通常都係無聲無息，慢慢咁升，成交唔會太大。

好多人嘅錯覺，以為升市一定要配合成交放大先係堅料。其實要視乎你講緊嘅 time frame 有幾長。

2007年6月，恆指以千億破紀錄成交突破21000點，升到23000點就已經掉頭回落到19300點。

2008年4月，熊市中嘅恆指以400點及頗高成交突破橫行區至25600點，點知一個禮拜就係26300點見咗頂。

今年4月就更加唔駛提。恆指強力爆升到27000點，但係去到28000點就無力為繼。

結論係，大成交配合升市，的確會營造一段升勢。但係時間未必長，而且好有可能會跌破返爆升前果個位。反而係低位，細成交更有可能係漫長升勢嘅開始。至少唔可以算係坊間所講嘅淡市訊號。