選擇適合自己嘅炒股模式

話說坊間其實有好多種成功嘅炒股方法。雖然日前我哋提到技術分析最適合八十後，但係其他嘅方法亦有其優勝之處，關鍵在於你要選擇適合自己嘅模式。

當年見到有朋友用財技炒股法賺到第一桶金，覺得好有型。但係先天無相關人脈、背景，做起上嚟事倍功半。其實正正係犯咗以己之短、攻敵之長嘅錯誤。所以我哋用自己獨特嘅學識背景，主攻技術分析，將自己嘅炒股模式由冇砌到有，建立咗一套自己嘅方法。

在小說裏面，小龍女係重陽宮擊退西域三大高手之後，奔到玉虛洞前，再戰金輪法王。金輪法王一見到令佢大吃苦頭嘅玉女素心劍法，就已先行怯了。又見小龍女將套劍法愈耍愈快，竟然收起自己的五輪，傻咗咁同小龍女鬥快，只守不攻，淨係掛住自保。其實金輪法王根本不用同小龍女鬥快，反而一早用個金輪，大力扑落去小龍女個頭度，咁已經足夠K.O.小龍女㗎啦。

做人嘅嘢，最重要係要認清自己，運用自己嘅優勢。每人自有適合自己嘅炒股方式，又何必羨慕他人呢？